Das Littering isch doch zum schreye
si lön dr Abfall eifach gheye
ufs Trottoir, d Stroos halt überall
sogar im Wald hets jetzt Abfall
do meint ein dir sit nit ganz zwäg
nit Müll dasch dr Skulpturewäg
Dr Alex Frei bim FCB
eus hets vor Freud fascht öppis geh
doch s isch im nohnig richtig wohl
er schiesst für uns no zwenig Goal
frog doch dr Roger, dä het Pfeffer
nur ei Schuss und grad zwei Träffer
Erscht nach Tescht's mit DNA
nimmt dr Hakan Yakin s Buschi a
au unverhofft im Basler Zoo
duet e Aff e Jungs becho
s wird teschtet, gsuecht wär isch dr Papi
nach langem denn, s isch nit dr Haki
Em Halbschueh Busch schiesst ein vor Johre
es paar Halbschueh fascht an d Ohre
Gummistiefel schieße d Burre
d Leuthard duet eim fascht chly dure
es Souvenier het bello Silvio
mitz an Grind gschosse becho
dr Stadtrot dä duets sehr begrüesse
das Chremer Gräbe nit chönn schiesse
Die Schweinegrippe Pandemie
isch gar nit cho und scho verbiy
und Impfstoff hei jetzt alli zviell
wo ahne mit, wenns kein me will
nach Libye ghört dä Stoff verleit
dört bruchts de gege Saublödheit
Die Meitli vo der Miss-Schwyz Wahl
si hübsch, doch s dänke isch e Qual
die hei doch gmeint es isch kei Scherz
das uff dem Bild do sig dr Merz
do druf Hunziker Michele
und dä das sig dr Willhelm Tell
si glaube au dem chönn me traue
si sin nit schlau so hübschi Fraue
Männer scho, hei me Bit und Byts
wie byspielswys dr Msiter Shcwiez
chuum isch er Tod dä armi Jacko
duet nur no si Musig cho
uf jedem Sänder im TV
uf jedem Radiosänder au
nur si Musig, chuum z erträge
mir hoffe dr Göle duet ewig Läbe
Sächs Kiffer kiffe easy do
fünf Alkis düen dumm umme stoh
vier Jugendbande wo düen schlägle
drei Schugger sötte das denn Regle
zwei Teenager wo total voll
ei Bahnhofplatz__gäll dä isch toll
Mir si Wältmeischter genial
mir Schwyzer sy phänomenal
d U17 Fuessballer si Guet
so si Schwyzer, cool mit muet
do meint dr Capitan vo dr Schwyz
mir si s bescht wos je hets gitz
trotzdäm das es sehr schwer isch
lehrne mir jetzt hebräisch
denn sette mir in Himmel cho
sett eus dr Herrgott au verstoh
doch gings in d Höll zum Lutzifer
Hochdütsch isch jo nit so schwer