die Cheibe Hypotheke Krise
duet d Wältwirtschaft total vermiese
d Banke si scho am verlumpe
dr Staat muess euses Gäld dry pumpe
Milliarde Franke keine Räppli
do isch 9. Stadion grad e Schnäppli
s isch pinlich gsi und zwar extrem
mir hei vom luege scho Ekzem
sisch wirklich sehr sehr tief s Niveau
hei angschtzuständ becho dervo
das will doch wirklich niemer gseh
mit Kopftuech d Micheline Calmy-Rey
dr Federer die armi Sau
verliert z Auschtralie leider au
dä Nadal duet in immer schlo
und trozdäm spielt dr Roger no
dä git nit uff duet immer welle
nur dr Fröhlich goht uf Dagmarselle
näbe Butterzöpf und früschem Brot
Erdbeertörtli knallig rot
Wurschtwegge und süesse Torte
Pralinnee in allne Sorte
gits ganz neu bim Finki z poste
mit Creme gfüllti Stroosepfoste
e Golfusrüschtig ganz komplett
Tennisbäll e Curlingset
Fuessballschue s isch klar mit Nocke
T-Shirt und sächs päärli Socke
Tennisschläger Joggingschue
acht paar Ski mit Stöck derzue
bim Visamsport an dr Poschtstroos
isch dank eus dr Umsatz gross
wäg em Fahrverbot hei mir das poschtet
sunscht hätts jedesmol e Lappe koschtet
mir si im Garte gsi am schaffe
chunnt s FBI im Aschlag d Waffe
nur gärtnere duet doch nit störe
das nur wäg diner lute Röhre
denn Du hesch dure Garte gschraue
nach em Busch dr Schwarzdorn abehaue
wetsch s Energiestadt Zeiche übercho
muesch sparsam mit em Strom umgoh
au z Lieschtel duet me d Umwält wahre
und Energie massiv ispare
am allermeischte mir mache d Wett
will dr Stadtroot gar kei Power het
iphone do und iphone dört
numme iphone dasch doch gstört
überall wird iphoniert
dr iphone virus dä grassiert
wägem iphone duen in Basel hüte
em Minu stündlich d Eier lütte