Es stoht e Brugg über d Allee
und unde dra e neue See
s Stedtli läbt und duet pulsiere
alli Läde düen floriere
d Pensionskasse isch überdeckt
und denn hett eus dr Wecker gweckt
mit dr Pensionskasse stohts nit so schlimm
es hett no 10 Millione „Lire“ drin
Im Schuelhuus z Lause ganz elei
längt s Verneli im Max ans Bei
er fummlet au, und git e Küssli
chli wyter obe wärs e gnüssli
ich will, öbwohl mir doch nit sotte
Nüssli si doch sträng verbotte
Uf jedme Schüeler, öpp junge öpp alte
stoht, cha Spure vo Nüss enthalte
Das Symbol zeigt d rotlicht Zone
dört wo z Basel d Nütli wohne
es stoht vor Püffer und Bordell
In neon Grüen ganz lüchtend grell
bi Basler Schugger chunnst s au druff
au die hei doch e riese Puff
das grüene Logo channsch au falsch verstoh
es wird statt Gummi Jute gnoh
E Sändig Blackout im Färnseh
au Lieschtel het me dörte gseh
e PC Hacker, s git scho Sache
probiert im Stedtli s Liecht us z mache
mir fühle eus e chli betroge
z Lieschtel isch dr Stecker doch längscht zoge
ä Blackout z Lieschtel s isch kei Gnuss
gits jede Daag nach Ladeschluss
Vegetarisch isch nümm in
will au dört, hets tierischs drin
vegan isch richtig und gerächter
die andere si fiesi Schlächter
dä muesch scho bald, s isch gopfergässe
dr Klöpfer dusse, bi de Raucher frässe
dr Minu mein öpp chalt öpp warm
e rächti Wurscht, die ghört in Darm
Die Fuessballtussis wo luut schreye
bi dr chlinscht berührig grad umgheie
am Bode wälze, fascht verecke
s Gsicht verzieh, d Ärm vo sich strecke
derby machts dene gar nit weh
me cha, Tatoos am Ärm, nur besser gseh
d Schwitzer sötte bim lo gheie nit z fescht bschisse
s Libli chönnt vo sälber risse
Er isch, und das isch wirklich schlimm
täglich in dr Zitig drinn
mit Hoor wo offesichtlich gfärbt
und d Hut isch vom Solarium gärbt
er het au gern chli churzi Röckli
nit dr Tramp, dr Meinrad Stöckli
Am Tump si Frau die isch scho bald
trotz churzem Rock am Tump scho z alt
Dr Papscht duet wieder um d Wält Reise
due Gottes Botschaft luut verheisse
küsst mänge Bode hebt mahnend d Hand
verkündet Gott heb ihn entsand
do mein dr Trump vo sich sälbscht bländet
dä ha ich, doch gar nit gsändet
dr Papscht salbt s Haupt vo eim mit Löckli
es viel Gel, dasch dr Meinrad Stöckli
Zwei Deppe wo kei Händ wei schüttle
düen s Baselbiet und d Schwyz ufrüttle
kei Handberührig mit re Frau
mir findes unter jeder Sau
me chönnti no Verständniss gseh
wenn d Hand am Jogi Löw muesch geh
Die zwei wei d Hand nit geh
do säg ich nur, uf wieder seeh